٣ أدوات تربوية تساعدك في التعامل مع عمر المراهقة
أعاقب ولا أطنّش ؟
السؤال اللي بسمعه كتير من الآباء اللي عندهم مراهقين ، أعاقب ولا أطنّش؟
الحقيقة انت كمربي مش مضطر تتجاهل أو تعاقب بس في حل وسط هختصرهولك في ٣ أدوات مرتبطين ببعضللتعامل مع الاولاد في المراهقة .….
ابنى لما كان صغير حركته كانت كتير وبالتالي أخطاؤه، جهلي بطبيعة شخصيته وسمات مرحلته عطلتنى خاصة أول مابدأ يدخل سن المراهقة ف بدأت بيننا مشاكل فوق احتمالي ، مكنتش عارفة أعاقب ولا أطنش؟ من هنا حاولت ادور عالطريق الأفضل اللي يقلل بينا الصدام ويساعده يكون أفضل نفسيا …فدرست التربية الإيجابية اللي كانت أول محطة في تحولى من أم عصبية لأم متفهّمة و متعاطفة …
ودول (٣ ) أدوات بسيطة ممكن اي مربي يبدأ بيها لتحسين علاقته بولاده في سن المراهقة
١/ (اسأل ولا تأمر )
كتير من الأباء بيستسهلوا طريقة الأمر في تربية ولادهم، فلما بيكبر الولد ويدخل سن المراهقة الطريقة دي بتفشل فشل ذريع ..
طيب ايه البديل ..اسأل ولا تأمر أو اطرح أسئلة فضولية
الطريقة دي بتحفز الولاد انهم فعلا يدوروا ع حل ويلتزموا به ، مثلا
بدل ما تقوله (اقفل الموبايل وروح ذاكر ). هتقول (ايه خطتك انهاردة للمذاكرة؟ هتبدأ بإيه؟ )
(الامتحان بتاعك كمان شهر ؟ ايه خطتك للتجهيز له؟ )
وكمان بتحسس ابنك إنه شريك في وضع خطته و ملزم بتنفيذها مش مفروضة عليه ودا بينقلنا للآداه التانية
٢/ (اعقد اتفاقات )
من أهم مبادي التربية الإيجابية هو ان الولاد يشعروا بالانتماء والأهمية ، وان النتايج تكون بعيدة المدى مش يحصل تغيير فوري …علشان كدة الاداه دي مناسبة جدا للمراهق العنيد او اللي دايما بيرفض اي طلب..
لما تلاقي في سلوك مزعج بيتكرر و تكون جربت الكلام و العقاب و الحرمان و برضو مفيش فايدة، جرب الاداه دي …تقعد مع ابنك و توضحله انك ملاحظ سلوك معين منه مضايقك، وأنك محتاج تتكلم معاه فيه ..وتجيب ورقة وقلم وتعملوا عصف ذهني …
مثلا (التأخر والسهر مع أصحابه في خروجة الأسبوع). هتقول احتياجك وتسمع رده و اطلب منه اتفاق ع موعد محدد للوصول في البيت و والوسيلة المناسبة اللي يتواصل معاكم بيها لو خصل جديد و ايه أقصى موعد مسموح به للتأخر و اسمح له بالنقاش لغاية ماتوصلوا لاتفاق مرضي للطرفين و وضع عافية متفق عليه في حالة عدم الالتزام …
آخر او تالت اداه مرتبطة باللي قبلها برضو وهي
٣/ (قرر ماذا ستفعل و استمر في المتابعة )
كتير من المربيين مش بيقولوا اللي يقصدوه و لا يقصدوا اللي بيقولوه أحيانا ، والأولاد عارفين دا كويس .
الأولاد بيحسوا بالأمان اكتر لما يشعروا إن اهاليهم ليقصدوا اللي هم عايزينه بالضبط و كمان بيتابعوا معاهم بشكل من أشكال الاحترام و الثقة ..مثلا طالما اتفقتوا ع اتفاق محدد حاولي تكوني صادقة في تنفيذه و اشرحي هدفك كويس و بعدين تابعي معاه ، وفكريه بالاتفاق … هو بس بيبقي محتاج اهتمام في السن دا مع انه مش بيبقي باين عليه
دول مش الأدوات الوحيدة ؛ في حوالي (٥٢ ) اداه مختلفة لأعمار مختلفة، انا حاولت أشارككم بأهم (٣ ) أدوات لهم تأثير إيجابي عالعلاقة بينكم ، ولما جربتها كانت بتحللي مشاكل مكنتش متخيلة انها ممكن تتحل الا بالعقاب …
وماتنسوش( التربية محتاجة صبر )
تابعوا معايا أدوات أكتر في المقالات القادمة إن شاء الله
