تجربة . شغف . علم

أنا نيرمين إنسانة مرت بتحديات  ممكن يمر بيها أي حد، بس فكرت اني مفضلش اشتكي وبس 

متزوجة وبفضل الله ربنا رزقنا بالشمس والقمر في بيتنا 

الشمس هو عبدالله 16 سنة اللي ضحكته بتنورلي حياتي ، والقمر هي عائشة 10سنوات اللي كلامها بينور قلبي.

زي أي أم كنت دايماً بدور على أفضل وسيلة أربي بيها الولاد،اشتريت كتب تربية كتير،اتفرجت علي فيديوهات ونصايح عن التربية ،قرات لعلماء نفس التربية والنمو … كل دا ليه؟ 

لإني كنت  بدوّر ايه الطريقة اللي ينفع أربي بيها في الزمن دا  ومن غير ثواب وعقاب ، ولإني جرّبت وعارفة تأثيرهم السئ على المدى البعيد .

((دراستي و تجربتي العملية))

 اتخرجت من كلية الآداب قسم  اجتماع وعلم نفس و في الجامعة  اتعلمت أن صلاح المجتمع يبدأ من الأسرة الصغيرة 

اشتغلت معلمة  في حضانة لحد ماتزوجت  وبعدين تطوعت ٥ سنوات في مجال بناء الشخصية للأطفال واتعاملت مع أنماط مختلفة منهم ،فقدرت أميّز بين الطفل اللي بيتعاقب والطفل اللي بيتعامل باحترام،  وكنت خلفت ابني عبدالله. وللأسف غلطت كتير في التربية مرة أعامله بالتدليل ومرة بالشدة ، مكنتش عارفة امتي ألين وامتى أشد ، لحد ما ظهرت طبعا آثار التربية الغلط دي على سلوكه ، هنا أدركت إني محتاجة أتعلم .

((الشغف و التعلّم ))

 وبدأت أحضر ورش التربية الإيجابية مع م/أمنية عسكر فضلت احضر كأم لمدة سنتين تقريباً …طبقت أدوات ، وفي أدوات كانت مش سهلة إني أطبّقها بسبب مشاكل في شخصيتي ومن هنا بدأت أشتغل على ونفسي ولازلت بشتغل 😊 ،  وبدأت مرحلة جديدة من الوعي و أتجرأ وابادر في إني اكون معلمة تربية ايجابية معتمدة للآباء ، ودي كانت أول خطوة في التغيير 

 ، وبعدين حضرت أول موديول للإينياجرام مع خالد الشربيني know thyself  عشان أفهم نفسي وأساعد نفسي اكتر ، وقتها كنت اشتركت في مجموعة paradigm shift  للمهندس مهاب عثمان، وفي البارادايم بفضل الله قدرت أستوعب يعني ايه أسعى لمفهوم تحقيق مراد الله منّي  ودي مرحلة مختلفة غيّرت رؤيتي وتفكيري ورسمت حلمي اللي هو  

    Empowering Families and Teens 

  و دا خلانى أتعلم  عشان أكون كوتش علاقات  من ICF و خلال الفترة دي تعمقت أكثر في الإينياجرام  مع المهندس محمود فؤاد……

Positive discipline/   Relationship coach/ Enneagram 

و دي ورشة عملتها عن التربية الايحابية لسن المراهقة..ادخلوا شوفوها 

https://m.facebook.com/story.php?story_fbid=551728965160621&id=523003568033161

واشتغلت مع المراهقين كمان  

https://www.facebook.com/NermeinHozayen/videos/335425197335060?s=100003611637886&v=e&sfns=mo

وعملت ورشة أونلاين للأمهات  عن تقدير الذات 

كل الرحلة الطويلة دي  ( رحلة الوعي اللذيذة ) . كانت خطوة من حلم ،كان يراودني، ولا يزال، إني  أساعد كل أم وكل أب في تحسين علاقاتهم ببعض وبأبنائهم. ودا كان احتياجي الأساسي كأم.  ازاي اتواصل مع ولادي بلغتهم هما وازاي اوصلّهم حبى وتقديرى لهم بدل ما كان كل اللي بيوصلّهم  سيطرة و خوف وشك 

كلنا عايزين نشوف  ولادنا سعداء في مستقبلهم ، ناجحين وواثقين في قدراتهم ….

رحلة التربية. بتبدأ بيكو ( الأب. والأم ) 

هدفي إنّي أنقل تجربتي لكل أب وكل أم عشان نوصل مع ولادنا وبيهم لبرّ الأمان

هدفي إني أنشر فكرة  إن أولادنا نور بلاش نحولهم  لنار في حياتنا بسبب مشاكلنا  وقلة وعينا بنفسنا ، ودا بيخلينا نخاف عليهم أوى ومن هنا تحصل الفجوة 

دي رحلتي من بداية الطريق وأتمنى  إنّي لا أضلّه 

Knowing yourself is the beginning of all wisdom