٤ سموم في التواصل بتهدد استمرار العلاقة الزوجية
الدكتور جون جوتمان دكتور في علم النفس ومهتم بمعرفة الأسباب الحقيقية اللي بتسبب الانفصال بين الزوجين ؛ من خلال تجربة عملها بين الأزواج وصل لنتيجة هي أن مش كل التفاعلات السلبية هي السبب ، بس في ٤ أشكال منهم بالتحديد بتمثل خطر كبير على استمرار العلاقة الزوجية بشكل صحى ، إذا الزوجين منتبهوش لها و استخدموا بدائل عنها ، و سمّاها ب (السموم الأربعة ) أو “the four horsemen”
اللي هما
اللوم – التبرير – الازدراء – الانسحاب
ووصل كمان في أبحاثه إلى أن الطريقة اللي بيتواصل بيها الزوجين تُنبئ عن ما ستنتهي به اي مناقشة بينهم و بتحدد الاطار اللي هيتحكم في شكل العلاقة ..
الخبر الجميل إن مفيش زوجان مثاليان ؛ وحتى الأزواج السعداء أحيانًا بيكون بينهم جزء من السموم الأربعة في علاقتهم، الفرق هو أن الأزواج السعداء بيتعرفوا على السموم الأربعة وبيبذلوا قصارى جهدهم لتجنب أثارها ..
ايه هى السموم الأربعة وايه هي الطرق ال إيجابية البديلة عنها .
هشرح كل واحد منهم في مقال منفصل.
أول السموم دي هو (اللوم)
اللوم هو هجوم شخصي علي الطرف الآخر وفيه نبرة اتهام بإنه سبب المشكلة ورد فعله بيكون دفاعي .
اللوم مختلف عن النقد ،لإن النقد بيركز عالسلوك الناتج عن المشكلة ، أما اللوم فبيبقي هجوم عالطرف الأخر في شكل شكوى عشان كدة تأثيره سئ وبيبقى رد الفعل تبرير ودا مش بيحل مشاكل …
فممكن بدل (اللوم ) نستخدم طريقة فعالة في التواصل تعبر عن مشاعر الطرف اللي بيشتكى وبيطلب فيها تغيير طريقته بشكل اكثر لطفاً واسمها
“I statement ”
وفيها بنبدأ بجملة
*أنا أشعر ب … بوصف شعورى الحقيقي
*عشان …. بشرح السبب او بوصف الموقف اللي تسبب في الشعور
*وكنت أتمني أو و أحتاج منك …لإن شريكك مش هيعرف لوحده انت محتاج ايه ، ف مفيد لك وله انك تقول احتياجك بالضبط
*اتكلم بهدوء وبلغة مهذبة
*عبر عن تقديرك لما يفعله شريكك من أفعال صحيحة ترضيك .
هشرح لكم بطريقة عملية جملة باستخدام اللوم و ازاي نستبدلها بطريقة ايجابية بديلة .
“انت كل ما تخرج معايا تبص ف موبايلك ومش بتهتم بيا،دي سخافة”
الطريقة الصحية :
” أنا أشعر بالألم لما بتركز مع موبايلك واحنا خارجين، هكون مبسوطة أكتر لو اتكلمت معايا وسبت الموبايل انا محتاجة أكون معاك لوحدنا ”
ولما يعمل كدة أشكره و أثنى على تقديره لمشاعرى …
دا كان شرح مبسط لأول سم في التواصل واللي بيسبب من غير مانشعر لمشاكل تؤدي في النهاية للإنفصال ،مهم جدا ناخد بالنا احنا بنستخدم أي سم فيهم علشان نتجنب آثاره السلبية في علاقاتنا المهمة وخاصة الزوجية .
