سموم العلاقات : الجزء الثاني مع السم رقم (٢) وهو التبرير
اتكلمنا في المقال اللي فات عن أول سم من سموم العلاقات ، وكان (النقد ) ، وشرحنا ازاي النقد خطوة في طريق قطع التواصل الإيجابي وبالتالي ممكن يؤدي لانفصال الشريكين
في المقال دا هنتكلم عن السم التالي وهو مرتبط بالسم الاولاني واسمه (التبرير )
٢/ التبرير أو Defensiveness
هو حيلة دفاعية كنوع من أنواع حماية النفس و محاولة إثبات برائتها من أي اتهام، أو أي هجوم شخصي .كثير من الناس بيبقوا دفاعيين لما بيتعرضوا للانتقاد.
وكتير من الأبحاث أظهرت إن الطريقة دي نادرا ما بتوصل لنتيجة مرضية للطرفين أو بتحل مشاكل ؛بالعكس !
لأن التبربر هو في الحقيقة وسيلة لإلقاء اللوم على شريك حياتك كإنك بتقوله ، المشكلة مش فيا ، هي فيك
!!
المبرراتى بيحب يلعب دور الضحية
دايما وممكن يكون بينتقد ويبرر في نفس الوقت
و التبرير هو سلاح الشخص العاجز
وكمان بيكون مجادل بشكل مستفز
تخيل كدة انك رجعت ف يوم متأخر جدا و زوجتك كانت متفقة معاك ع خروجة و لما رجعت قالتلك ايه التأخير دا كله لو كنت رجعت بدرى كان زماننا روحنا السينما ، روحت انت رادد عليها وقلت لها ماحنا كل ما بنروح السينما وبختار لك فيلم وبيبقي مش عاجبك ، فبنتخانق ف الآخر ، فقلت أخودها من قصيرها أحسن …
الزوج هنا بدل ما كان يتعامل مع شكوى الزوجة بشكل هادي رمى لها الكورة ف ملعبها و حمّلها هي مسؤولية تأخيره!! كإن هي السبب الحقيقي في تأخيره ..
لاحظتوا هنا ان الزوج رد عا لشكوى بشكوى مضادة ازاي؟!
تفتكروا هل دي وسيلة تواصل صحية هتوصّل لحل او تبنى حوار جيد ؟!
طيب نعمل ايه بدل التبرير !؟
الحل بسيط جدا ، تتحمل المسؤولية ، لإن التبرير هو التخلى عن المسؤولية وتحميلها للشخص التاني ، وفي مثالنا هنا الزوج حمل زوجته المسؤولية
“جون جوتمان ” توصل في البحث اللي عمله إن تحمل
المسؤولية ولو لجزء صغير من المشكلة، يمكن يقلل حدة التوتر بسرعة ويمنع تصاعد الصراع ويساعد شريك حياتك على الشعور بالسمع والفهم.
طيب تعالوا نشوف الحوار لو تم بطريقة فيها (تحمل مسؤولية ) هيكون ازاي ..
الزوجة هتشتكى للزوج :
تأخيرك دا ضيّع علينا فرصة الذهاب للسينما انهاردة ، انا زعلانة منك و بصراحة اتخنقت من تأخيرك دا كل يوم .
الزوج :
أنت عندك حق ، أنا آسف لأنني تأخرت االليلة، هحاول بعد كدة اظبط مواعيدي بحيث نلحق نخرج ونلحق معاد السينما ….
ياترى مين فينا بيستخدم في لغة حواره مع شريكه السم دا ؟! و بعد ما قرأت المقال ازاي تقدر تتحمل جزء من المسؤولية بدل ما تبرر و بالتالي تتجنب حدوث مشاكل كتير انت ف غنى عنها ..وخد بالك السموم دي أسرع طريق للانفصال !
انتظرونى في المقال القادم و السم الثالث من سموم العلاقات …
