التمارين

التمارين من الحاجات اللي ناس كتير بتبقي عايزة تعرف يتعاملوا مع الولاد فيها ازاي .
عشان كده حابه أنقللكم تجربتي في الموضوع ده :

كويس جدا إن الولاد يختاروا هما عايزين يلعبوا ايه ، لكن السباحة بالنسبة ليا أنا (اختياري طبعا) حاجة أساسية .

و كان أول تمرين بنتي تشترك فيه هو السباحة ، كان سنها خمس سنين تقريبا.

عملت الاتي:

1-بما إن السباحة من الحاجات المهمة، اتكلمت معها الأول عن التطعيم اللي بتأخده .
قولتلها:” هو مهم ليه؟ ”
قالتي:” عشان يحمينا من الأمراض.” سألتها :”الحقنة بتاعته بتوجع ولا لأ؟” قالتي:” اه”.
قولتلها:” بتستحملي ليه؟”
قالتي:” عشان أحمي نفسي .”
قولتلها:” السباحة مهمه بردو عشان بتحمينا من خطر الغرق.”

2-تاني حاجة إديتها معلومات عن الرياضة دي، زي مثلا:
في الاول ممكن تخافي من الميه شوية، لازم تمسكي في السور،
كل حاجة في أولها صعبة لكن بالتدريب بتكون اسهل …..الخ

3-واحنا رايحين أول يوم قولتلها:” أنا واثقه فيكي إنك هتعملي كويس.”
(اديتها الثقة)

4-بدأت تمرين وطبعا عياط طول الحصة. ( متوقع)
بدأت اركز جدا عشان أشوف أي محاولة منها في التدريب أشجعها عليها، كانت ساعتها إنها تحط وشها في المية.

5-أول ما طلعت من المية قولتلها :”ما شاء الله إنت حاولتي تحطي وشك في المية .”
(تشجيع علي الخطوات الصغيرة).

6 -واحنا رايحين تاني مرة فضلت اتكلم معها هي اد ايه كان في صعوبات اتعرضت لها قبل كده وهي قدرت تتغلب عليها.
زي مثلا عياطها من ركوب باص المدرسة عشان بيلف كتير وبعدها قدرت فعلا تكمل في الباص.
( بفكرها بإنجازاتها عشان تثق في نفسها انها بتعرف تحقق انجاز فعلي) .

7-استمريت في إني أركز كل حصة في أي محاولة منها بتحصل في التمرين، حتي لو ما نجحتش للاخر .
(تشجيع المحاولة مهم جدا ).

8-لما وصلت لمرحلة انها بطلت عياط خالص في التدريب ، قولتلها:” ما شاء الله انت قدرتي تتغلبي علي مشكلة السباحة.”

9-بدأنا بعدها تمرين باتيناج ،كان الموضوع سهل جدا ،رغم إن وقعته صعبة بجد.
لما في الاول وقعت، قالتلي :” عشان ده بس في الاول يا مامي ،فاكرة السباحة كنت بعيط ازاي؟”

ومن هنا عايزة أقول في موضوع التمارين:.

• إدي معلومات لابنك عن التمرين.
• شجعي المحاولة حتي ولو بسيطة .
• اظهري الثقة إنه يقدر .
• فكريه بنجاح قدر يعمله في حياته .