أمّنا الغولة !
٦ عقبات بتعطل الأم الحقيقية اللي جوايا
كل أم بعد ما تخلف بحبة كدة و تعدي مرحلة الbaby الكيوت…بتبدأ تظهر عندها أعراض أمنا الغولة 👻
مهما كانت شخصية هادية جدا قبل الجواز و قبل الخلفة…اسألوني أنا!
كمية البهدلة و الاستفزاز اللي بنشوفه مع العيال بتوصلنا للأسف لمود أمّنا الغولة و فجأة بنتحول و طبعا انتو عارفين الباقي …بيبقى الأفضل ساعتها كل أفراد البيت ياخدولهم ساتر!
الفكرة اننا كل ما نبتدي نشتغل على نفسنا اكتر و نعرف ايه اللي بيستفز شخصية أمّنا الغولة انها تظهر كل ما قدرنا نروضها و نسيطر اكتر…
ايه ده يعني انت ممكن تتحولي لأمنا الغولة ؟
آه والله أنا زيكوا بالظبط بس اتعلمت و قدرت أحط ايدي على الحاجات اللي بتوصلني لكدة عشان الحق نفسي قبل ما أوصل للمرحلة دي
و حشارك معاكم ال٦ عقبات:
١- إني أوقف الكورسات سواء اللي بدرسها أو اللي بتعلمها
٢- إني أبطل قراءة سواء كتب او مقالات عن التربية
٣- أنسى أهتم بنفسي مدة طويلة ( self care )
٤- مضغوطة لفترة طويلة و مش بفصل او باخد بريك
٥- أقعد مدة طويلة مع ناس سلبية أو بتشفط أي طاقة إيجابية
٦- لو مبنامش بالليل كويس أيام كتير ورا بعض
الظريف بقى في الموضوع و دي بتبقى عاملة زي دش المية الساقعة كدة لما تكون أمّنا الغولة حضرت او على وشك الظهور و ألاقي ابني يقولي باستنكار هو ده الpositive discipline اللي بتعلميه للأمهات؟
و خلاص كدة مسكنى من ايدى اللي بتوجعني و عرف ازاي يفرملني…
الرسول (ص) قالنا إنما الحلم بالتحلم و الصبر بالتصبر…
يعني دي حاجة موجودة في البشر كلهم بس بنسب متفاوتة و محتاجين نشتغل عليها و نروض قلة الصبر و العصبية جوانا…
طب ايه الحل عشان تختفي امنا الغولة ؟
الحل في زيادة الوعي بنفسي!
الفكرة فكرة وعي في الاساس و بعد كدة ممارسة و أدوات لو اتعلمناها و بدأنا نمارسها بشكل يومي و عرفنا ايه اللي بيوصلنا لمرحلة “أمّنا الغولة” و قدرنا نفرمل قبل ما نوصلها، ده حيساعدنا بشكل كبير اوى و كل ما نحود في الطريق الغلط نقدر نلاقي حاجة ترجعنا للطريق الصح من تاني…
ابدئي من انهاردة اكتبي ايه العقبات اللي موقفاكي عن انك تبقي الأم الحقيقية اللي جواكي…
شاركونا يا ترى ايه اللي بيصحى جواكم أمّنا الغولة ؟ لازم تعرفوا ايه بالظبط عشان تقدروا تسيطروا عليها و تروضوها
