اذا عرف السبب بطل العجب

مين بيحصل معاه كدة؟ أول ما أفكر أتكلم في التليفون أو حتشغل في حاجة الولاد يتلموا عليا و الطلبات تبتدي و متنتهيش…
طب تعرفوا ان الحكاية دي بيكون ليها سبب احنا مش واخدين بالنا منه!

فيه حاجة في علم التربية اسمها معتقدات خاطئة بتتكون عند الطفل نتيجة اللي بيدور حواليه في البيئة المحيطة و ردود افعال الناس اللي حواليه
و من احد المعتقدات الخاطئة دي
انه عشان يحس بالانتماء ليكو لازم يفضّل يشد انتباهكوا ليه طول الوقت

يعني ايه الكلام ده؟
يعني المعتقد هنا: “عندما أجذب انتباهك سأشعر بحبك و انتمائي لك”

بس علماء النفس قالوا ان المعتقد ده بيكون وراه رسالة خفية الطفل عايز يوصلها…بس بيوصلها بطرق مختلفة و معظمها بتظهر في هيئة سلوكيات غلط
زي الزّن الكتير ، انك اول ما تتشغلي عنه يعمل اي حاجة حتى لو غلط عشان تتشغلي بيه مش عنه

و طبعا احنا ساعتها بيركبنا ١٠٠ عفريت و نحس بالاستفزاز …متسيبوني في حالي شوية!

عارفين ايه الرسالة؟
الرسالة الخفية هنا بيقولكم: “اشغلونى بحاجة مفيدة”

طب الحل ايه؟
اختاروا حل من الحلول دي و جربوها حسب الموقف و السن:

١- لو عارفة انك حتتشغلي بحاجة دلوقتي هيئي الطفل لده، و اديله حاجة يتشغل بيها هو كمان
ممكن تقوليله مثلا “انت لون الرسمة دي و انا حتكلم في التليفون و بعدها اجي أشوفها”

٢- حاولي تطنشي …لو في البيت و كل شوية يزن لمجرد الزّن و انتي لبيتي كل احتياجاته…طنشي و بعد شوية لوحده حيتشغل بحاجة تانية

٣- حددوا وقت يوميا للكواليتي تايم و يبقى وقت مركزين فيه مع بعض و بتلعبوا ، تقروا قصص و هكذا

٤- علميهم إشارة معينة (سيم بينكم) لما تعمليها يبقى حتتشغلي شوية

٥- لو سن مستوعب شوية، حطي الكورة في ملعبهم
قولي انك وراكي حاجة و حتتشغلي شوية، انتو حتعملوا ايه في الوقت ده؟

٦- لو جتلك مكالمة و بنتك فضلت تزن، خديها في حضنك، طبطبي عليها…من غير كلام حتلاقيها هديت

الخلاصة ان اي سوء سلوك بيكون في الغالب وراه سبب..ابحث عن السبب و اشتغل عليه…