أصون كرامتي
أصون كرامتي ، دايمًا أقول إن الأخلاق مبتتجزأش، ولا المبادئ كمان ممكن تتجزأ. والاحترام بالنسبة لي أساس الأخلاق، ومن أهم الحاجات اللي لازم كلنا نحترمها “كرامة الإنسان” اللي بنتعامل معاه.
لو كل واحد عمل حسابه إنه ميجيش أبدًا على كرامة أي حد بيتعامل معاه، العلاقات كلها حتبقي ناجحة. يعني الإخوات لازم يحترموا بعض ويراعوا كرامة بعض، الأقارب لازم يحترموا بعض ويراعوا كرامة بعض، الأصحاب لازم يحترموا بعض ويراعوا كرامة بعض.
وبستغرب جدًا جدًا من انتشار ظاهرة إن لما تلاقي قعدة صحاب بتلاقي واحد فيهم هو محط تريقة وسخرية من الشلة على سبيل الهزار وخفة الدم
طب وعلى سبيل الأدب مفيش إحساس أو مراعاة لشعور الصاحب اللي هرتوه تريقة عشان تضحكوا وتبانوا لطاف وخفاف، محستوش إن الكلمة اللي طالعة دي زي الرصاصة ممكن تقتل أو على الأقل هتعمل عاهة مستديمة جواه؟!
لكن من وجهة نظري إن الأصعب على الإطلاق هي:
مقولة غريبة بتقول “مفيش كرامة بين الأزواج”، مقولة لقيطة فعلًا مش عارفة الحقيقة أصلها إيه، يعني إيه مفيش كرامة بين الزوجين؟ إزاي يعني؟!! المفروض إن أي اتنين لما بيتجوزوا بتبقى كرامتهم واحدة، يعني كل واحد فيهم لو أهان كرامة التاني كأنه بيهين كرامة نفسه، وطبعًا مفيش حد طبيعي بيقبل أي إهانة لكرامته، ومن هنا ظهر تصرف أغرب يدل على خلل عقلي وتربوي، وهو إنك تلاقي الرجل الشرقي بقى عادي يهين مراته أو يضربها قدام ولاده أو قدام الناس، لكن عيب جدًا إنه يطبطب عليها أو يحضنها ويراضيها قدام أي حد.
يعني أنا مثلًا لا أتصور إن في راجل ممكن يقبل إن أي حد يتجرأ على كرامة مراته قدامه، يبقى من باب أولى إنه يكون أول واحد بيحترم كرامتها دي، إزاي واحد يهين مراته ويقل أدبه عليها، وبعدين يزعل لو حد أهانها أو غلط فيها؟! يعني هل في زوج ممكن يشوف حد بيضرب مراته قدامه أو بيشتمها ويسكت؟ أكيد طبعًا لأ.
طب إزاي هو نفسه ضربها وشتمها قدام ولادها ولا حتى مش قدام أي حد؟!
صونها إنت الأول، احترمها واكرمها وحافظ على كرامتها، وطبعاً العكس صحيح.
طب حتى على اعتبار إن ولادك بيتعلموا منك.. بتعلمهم إيه؟ العنف وعدم الاحترام؟!
بتعلمه إنه كراجل يمد إيده على واحدة ست عادي؟!
طب لما يشوفك إنت بتعمل في أمه كده تفتكر ده ممكن يكبر ويحترمك أو يحترم أمه؟!
تضمن إنه لو شد حيلة شوية وبقى طولك ميمدش إيده عليك أو على أمه؟
