انتى لسه هتفكرى ؟؟؟
انتى لسه هتفكرى ؟؟؟ مستغرباكى جدا على فكره
يعنى انتى طريقة تفكيرك مختلفه ومتميزة ، رافضه دايما انك تكون تقليديه او متوقعه من اللى حواليكى، عمرك ما قبلتى تكونى نسخه مكرره حتى من اقرب الناس ليكىي
ليكى نكهة حلوه ووجود مختلف وسط اصحابك وبين اهلك وعيلتك بشهادة الجميع حواليكى وكل اللى عرفوكى
، ده حتى انتى بتخترعى لنفسك طقوس في الحزن، وطقوس في الانبساط وطرق كتير فى السعاده ليكى وللى حواليكى
، بس قوليلى بجد انتى ليه بتخافى تفكرى نفسك بنجاحاتك؟
ليه بتخافى تفكرى فى نفسك اساسا ؟
طب بذمتك مش فاكره تجربة شغلاناتك القديمة،
التطور اللي بيحصل في شخصيتك دايما من وقت لتاني، استعدادك انك عايزه تعرفى و تتعلمى دايما حاجات جديدة،
وحاجات تانيه كتيراوى بس انتى من خيبتك بتشوفيها حاجات عبيطة متستهلش انك تفكرى نفسك بيها!!
يا حبيبتى لعلمك الحاجات العبيطة دي في وقتها كانت نجاح اقتنعتى او مقتنعتيش ده مش هيغير حاجه في الموضوع،
بلاش تبقى انتى اول شخص ماسك شاكوش وبيكسر فيكى ويهدمك؟ والمفروض انك محتاجه اللي يبنيكى وبتتحججى ان محدش مديكى فرصه او مساحه لده
يا بنتى الله يهديكى انتى نجحتى فعلا !! النجاح مينفعش تقيسيه او توزنيه بالكليو!!
لانه بيتقاس علي حسب وقته والامكانيات والاحتياجات اللى كانت متاحه في الوقت ده،
دلوقتى انتى عندك حلم كبير وهدف أكبر …ها مالك بقا مش عاوزه ليه تقربيله
انت عارفه المشكله فين؟؟
المشكلة مش في انك متقدريش تحققى حلمك، المشكلة انك شايفه انك مش هااااتقدرى
طب ليه؟ خايف تفشلى مثلا واللى حواليكى بيقوللك انتى مش اهل لها ؟؟
طب ما ياما قالولك كده واتحديتيهم وحسيتى بضعفين سعادتك لما نجحتى واثبتى فشلهم هما
وبعدين ايه المشكله لما تفشلى مره واتنين وعشره وتفضلى تفشلى وتتعلمى لحد ما الفشل يزهق منك ويسلمك تسليم اهالى للنجاح
ايه خايفه تتعبى وماتوصليش مثلا ؟؟
احلى حاجه الراحه اللي بتكون بعد تعب لانك بتشوفى انك تستحقيها، ثم ان تعب شوية وبيروح ايه المشكلة،
بصى بقا عشان الزهق نفسه زهق منك كمان …بجد طول ما انتى حاسه انك مستغربه حلمك ومستكتراه على نفسك عمركو ماهتتقابلوا سوا، ودي حلها انك تصحبيه، لو صاحبتيه خليكى جدعه معاه، واحلفلك انك هتوصليله وتعيشى معاه على ارض الواقع …ايه مستغربه ليه ؟ ايوه صاحبى حلمك وحبيه واتمسكى بيه
هاااا قولتى ايه ؟انتى لسه ها تفكرى؟
